Gipasalig sa Commission on Elections (Comelec) ang ilang kaandam alang sa umaabot nga Parliamentary Elections sa Bangsamoro Autonomous Region in Muslim Mindanao (BARMM) nga gikatakda sa Oktubre 13, 2025.
Miingon si Comelec Chairman George Erwin Garcia nga anaa na sa 90% ang ilang pagpangandam alang sa eleksyon, lakip na ang logistics, voter lists, ug training sa mga poll workers.
Sumala pa, magpadayon ang eleksyon sa BARMM sa oktubre ug wala nay rason nga malangan pa, dungan sa pagpasalig nga bisan og nalangan ang Barangay ug Sangguniang Kabataan Elections sa ubang bahin sa nasud, dili kini makaapekto sa gikatakda nga eleksyon sa rehiyon.
Gibanabanang 2.3 milyones ka mga botante ang gipaabot nga mosalmot sa maong eleksiyon sa BARMM
Kahinumdoman nga niadtong Pebrero, gipirmahan ni Presidente Ferdinand Marcos Jr. ang balaod nga nagbalhin sa petsa sa BARMM Parliamentary Elections gikan sa Mayo ngadto sa Oktubre, subay sa panawagan sa mga regional leaders nga hatagan og dalan ang mas hapsay nga transisyon ug pagpangandam niini.
via: COMELEC
