MALAYBALAY CITY- Duha ka patayng lawas ang nakita nga nagbuy-od sa salog sa ilang balay nga adunay mga samad tinigbasan didto sa Purok 7, Barangay Kaatuan, Lantapan, Bukidnon atol pagrespondi sa kapolisan sa lugar alas 9:45 sa buntag Agosto 5, 2025.
Sa inisyal nga imbestigasyon nasayran nga samtang nangatulog ang mga biktima, ang suspetsado giingong nisulod sa ilang balay ug gitigbas dayon misibat paingon sa wala matinong direksyon.
Giila ang lalaki nga si alyas “Daddy Alejan” 66 anyos kinsa nakaangkon og mga samad tinigbasan sa likod nga bahin sa iyang liog, duha sa iyang tiyan, wala nga tuhod ug wala nga kamot samtang ang iyang live-in partner si “Catherine” 68 anyos, babaye nakaangkon og mga samad tinigbasan sa iyang likod ug tiyan.
Narekober gikan sa crime scene ang usa ka sundang nga gibana-banang 30 ka pulgada ang gitas-on lakip ang kuptanan.
Sa karon ang mga personahe sa Lantapan MPS padayon nga nagpahigayon og imbestigasyon aron matino ang motibo ug pagkatawo sa miikyas nga suspetsado ug mihangyo sa Bukidnon PFU nga iproseso ang crime scene.
Gikataho nga ning bag-o lang nahalinan sa giharvest nga cabbage ug baka ang magtiayon.
via: Jay Jay / Lantapan Municipal Police Station
