Gikompirmar ni COMELEC Chairman George Erwin Garcia nga gikatakdang pirmahan ni Presidente Ferdinand Marcos Jr. ang balaudnon nga nag-postpone sa Barangay ug Sangguniang Kabataan Elections (BSKE) karong Disyembre ug ang pagbag-o sa termino sa mga piniling opisyal.
Matod ni Garcia, ang BSKE ipahigayon sa Nobyembre sa sunod tuig. Ug upat ka tuig ang termino sa elected officials sa barangay nga adunay posibilidad nga magpapili pag-usab alang sa laing termino, samtang upat usab ka tuig ang termino sa elected officials sa Sangguniang Kabataan apan usa ra ka termino ang ilang maserbisyohan.
Bisan og dili kini mahimo, gipasalig ni Garcia nga magpadayon gihapon ang ilang pagpangandam sama sa kasamtangang 10 ka adlaw nga voters registration. Usab, pipila ka pagpalit sa mga kahon sa balota ug mga folder nga gamiton tungod kay dili kini makaapekto. Giklaro ni Garcia nga wala gihapon silay gipagawas nga pundo alang niini.
Sa laing bahin, gipahibalo usab ni Garcia nga kining maong desisyon makahatag og dakong kahupayan sa poll body tungod kay nangandam na sila sa labing unang Bangsamoro Parliamentary Elections.
Si Garcia padayong niawhag sa publiko sa pagsalmot sa 10 ka adlaw nga voters registration sa komisyon. Matod niya mahimo silang moadto sa ilang lokal nga buhatan sa COMELEC, satellite registration sites ug sa bag-ong Register Anywhere Program nga mahimong ipahigayon sa mga malls, terminal ug uban pang lugar diin mahimo ang pagparehistro.
Kadtong buot magparehistro gikinahanglang magdala ug orihinal nga kopya sa government issued IDs ug alang sa mga batan-on, ang ilang school IDs.
SOURCE: Ma. Kamila Ysabel Cotoner
photo credits:sunstar.com.ph
