Niabot na sa P2.34 bilyones ang kadaot sa sektor sa agrikultura tungod sa sunod-sunod nga mga bagyo ug pag-ulan dala sa habagat sa miaging semana, sumala sa Department of Agriculture (DA).
Base sa pinakaulahing report gikan sa DA, 74,895 ka mga mag-uuma ug mangingisda ang naapektuhan, diin 53,356 ka metriko tonelada sa mga pananom ang nangaguba sa gibana-bana nga 71,958 ka ektarya nga umahan.
Ang labing dakong kadaot sa farm land nga niabot na sa P1.27 bilyon diin kapin sa 67,000 ka ektarya ang nangadaot.
Dugang pa, ang sektor sa mais nakahiagom og P83.44 milyones nga kapildihan samtang 9,574 ka metriko tonelada sa mga high-value crops ang nangaguba.
Agig tubag, ang DA migahin ug P653.01 milyones nga hinabang sama sa mga seeds, free-range nga manok, fingerlings, ug pest control supplies. Ang National Food Authority (NFA) niapod-apod usab og 43,940 ka sakong bugas sa mga apektadong LGUs sama sa Palawan, Pangasinan, ug Albay.
Ang Quick Response Fund gi-activate usab alang sa rehabilitasyon, samtang adunay P400 milyones nga loan ubos sa SURE Loan Program alang sa mga apektadong mag-uuma nga walay interes ug bayran sulod sa tulo ka tuig.
Ang Philippine Crop Insurance Corporation (PCIC) nigahin usab og P268 milyones isip down payment sa halos 46,000 ka insured nga mag-uuma.
Bisan og wala direktang hisgoti ni Presidente Ferdinand Marcos Jr. ang Pag-atubang sa epekto sa bag-o lang nga kalamidad sa iyang ikaupat nga State of the Nation Address (SONA) niadtong Hulyo 28, siya miingon nga ang iyang administrasyon nakahatag na og hinabang sa kapin 8.5 milyones ka mag-uuma ug mangingisda sa tibuok nasod.
Source: Jhon flores
Photo:net25.com
