𝗚𝗛𝗔𝗡𝗔𝗜𝗔𝗡 𝗗𝗥𝗨𝗡𝗞𝗔𝗥𝗗 𝗔𝗦𝗦𝗢𝗖𝗜𝗔𝗧𝗜𝗢𝗡 𝗡𝗔𝗚𝗣𝗥𝗢𝗧𝗘𝗦𝗧𝗔 𝗦𝗔 𝗧𝗔𝗔𝗦 𝗡𝗚𝗔 𝗣𝗥𝗘𝗦𝗬𝗢 𝗦𝗔 𝗜𝗟𝗜𝗠𝗡𝗢𝗡

Bag-o lang nagprotesta ang Ghana Drunkard Association aron ipahayag ang ilang hugot nga pagsupak sa padayong pagsaka sa presyo sa alkoholikong ilimnon sa ilang nasod.

Sa usa ka lihok protesta nga gipahigayon sa dakbayan sa Accra, gihangyo sa grupo ang gobyerno nga tubagon dayon ang ilang mga reklamo ug mahatagan og solusyon ang pagsaka sa presyo sa alkohol.

Matod ni Moses Onyah, nailhan usab nga “Dry Bone” ug presidente sa nasangpit nga asosasyon, nabatyagan sa ilang minilyon nga miyembro ang 15 porsiyento nga pagsaka sa presyo sa alkohol. Dugang pa niya nga samtang ang presyo sa ubang mga palaliton mius-os tungod sa kusog nga ekonomiya, ang presyo sa alkohol nagpabilin nga taas.

Ang asosasyon naghatag sa gobyerno og tulo ka semana nga ultimatum aron masulbad ang isyu, ug nanawagan usab alang sa tabang gikan sa ilang kanhi Presidente John Dramani Mahama. Gitataw ni Onyah nga andam silang mohimo og mas lapad nga protesta kung mapakyas ang gobyerno sa pagpaminaw sa ilang panawagan.

Bisan pa sa kataw-anan nga ngalan niini, ang Ghana Drunkards Association (GDA) usa sa labing inila nga asosasyon sa Ghana, nga adunay gibanabana nga 6.6 milyon nga mga miyembro.

Ang GDA dili lang bahin sa pag-inom, ang grupo nailhan usab sa pagpasiugda sa responsable nga pag-inom, lakip ang mga kampanya batok sa pagmaneho sa hubog ug mga proyekto sa edukasyon sa husto nga pagkonsumo sa alkohol.

Ang GDA usa ka modernong organisasyon, nga naggamit sa social media ug digital nga mga plataporma aron ipakaylap ang ilang adbokasiya. Namatikdan usab nga naglunsad sila og usa ka app sa pag-order sa alkohol online, sa tinguha nga makunhuran ang insidente sa mga aksidente sa kadalanan.

Bisan pa sa satirical nga imahe, ang asosasyon nakahimo og dagkong kontribusyon sa pagdani sa pagtagad sa sosyal ug ekonomikanhong mga isyu nga nakaapekto sa ilang sektor.

Sa pagkakaron, ang GDA nagpadayon sa pagtawag alang sa patas nga presyo sa alkohol ug responsable nga pag-inom, samtang bukas usab sa dayalogo ug kooperasyon sa gobyerno alang sa kaayohan sa ilang mga miyembro ug sa katilingban sa Ghana.