Gipagawas sa mga rebeldeng Houthi ang video sa ilang pag-atake ug ang pagpalunod sa Liberia-flagged Bulk Carrier Eternity C sa Red Sea niadtong Lunes, Hulyo 7, 2025 nga mikalas og tulo ka indibidwal.
Ang video nagpakita sa mga missile nga gilusad sa Houthis hangtod sa sunodsunod nga mga pagpabuto sa cargo ship nga hinungdan sa pagkalunod sa barko. Nakita usab ang pipila ka mga armadong indibidwal nga misakay sa barko ug gipakita usab ang kadaot nga naangkon sa cargo ship.
Ang cargo ship nagkarga og 25 ka tripulante sa dihang naigo kini sa mga ballistic ug cruise missiles nga gilusad sa Houthis, nga nakadaot pag-ayo niini. Kadaghanan sa mga tripulante nga sakay sa giatake nga cargo ship mao ang 21 ka Filipino seafarer ug aduna usay usa ka Russian national nga grabeng naangol ug naputlan og tiil.
Nagpadayon ang pagpangita sa 15 ka mga tripulante nga gikataho nga namissing pagkahuman sa pag-atake. Una nang naluwas sa mga rescuer ang unom ka mga seafarer human sila nalubog sa tubig sulod sa usa ka adlaw.
Sa pikas nga bahin adunay nagkasumpaki nga mga taho bahin sa gidangatan sa ubang mga naluwas sa pag-atake. Ang US Embassy sa Yemen miingon nga gikidnap sa mga Houthis ang pipila sa mga naluwas nga tripulante sa cargo ship, apan ang mga Houthis miingon nga ilang gidala ang wala matino nga gidaghanon sa mga tripulante sa usa ka luwas nga lugar.
Ang Eternity C mao ang ikaduhang barko sulod sa duha ka adlaw nga nalunod sa Houthis ug ang ikaupat human sa pag-atake sa rebeldeng grupo sa MV Magic Seas, MV Rubymar ug MV Tutor. Ang mga rebeldeng Houthi sa sinugdan miangkon nga responsable sa pag-atake sa Eternity C tungod kay kini padulong sa Israel.
Kahinumdoman nga ang mga pag-atake sa mga Houthis sa mga barkong sakop sa Israel nga moagi sa Red Sea naggikan sa simpatiya sa ilang kaalyado nga Palestinian rebel group nga Hamas sa Gaza, nga nakig-away batok sa Israel.
