Mopakatap og 11,949 ka mga kapulisan, Ang Philippine National Police (PNP) sa tibuok nasod alang sa seguridad sa adlaw sa State of the Nation Address (SONA) ni Presidente Ferdinand Marcos Jr.
Sa press conference sa Camp Krame, si PNP Spokesperson PBGen. Jean Fajarado nikompirmar nga nagpatawag og command conference ang hepe sa nasudnong pulisya nga gitambungan sa mga regional director, partikular na sa regional director gikan sa National Capital Region Police Office (NCRPO), aron tukion ang deployment sa adlaw sa SONA sa Presidente.
Human niini, mopahigayon usab og coordinating conference ang PNP uban sa Office of the Sergeant-at-Arms sa House of Representatives aron maplantsa ang pipila ka security protocols nga ipatuman sulod o gawas sa Batasan.
Nunot niini, ipatuman usab ang Manila Shield diin ang mga pulis gikan sa Police Regional Office III ug Police Regional Office 4A mohatag og dugang ayuda sa pagmonitor ug pagpatuman sa border control sa mga utlanan sa nasod.
Matod niya nga posible usab nga adunay minimal nga adjustments diin adunay total deployment sa adlaw mismo sa SONA diin magamit usab ang reserve forces sa nasud aron masiguro ang kaluwasan ug kahapsay sa maong adlaw.
Samtang, wala pay nadawat nga aplikasyon ang Quezon City Police District (QCPD) alang sa pagpangayo og permit to rally sa adlaw mismo sa SONA. Matod niya nga usa kini sa gituki sa command conference alang sa SONA ug kasamtangang nakig-alayon na ang kapulisan sa mga grupo nga kasagarang nagpahigayon sa ilang mga rally aron masiguro nga hapsay ang ilang mga programa.
Ang mga programa nga giplano sa mga militanteng grupo tugotan lamang sa usa ka bahin sa Tandang Sora. Sa pagkakaron, gipaabot nga mahuman na ang coordinating conferences tali sa PNP ug Office of the Sergeant-at-Arms ug sunod nga makig-coordinate ang National Police sa mga grupo nga mag-organisa sa ilang mga programa ug mga lihok-protesta alang sa briefing kon asa sila tugotan sa pag-organisar sa ilang mga rally.
