Gidasig sa Provincial Price Coordinating Council (PPCC) ang hugot nga pagtinabangay ug koordinasyon sa mga opisina, ahensya, ug Local Government Units (LGUs) aron atubangon ang posibleng epekto sa Super El Niño ug ang pagsaka sa presyo ug suplay sa Basic Necessities and Prime Commodities (BNPCs) sa probinsya. Gipadayag kini atol sa PPCC 4th Quarter Regular Meeting nga gipangulohan ni Provincial Governor Rogelio Neil P. Roque niadtong Nobyembre 18, 2026, sa PPDO Conference Room, Kaamulan Park, Malaybalay City.
Partikular nga gituki sa tigom ang kasamtangang pagsaka sa presyo sa baboy, karne niini, ug mga produktong petrolyo. Giawhag ang mga LGU nga padayong bantayan ang mga presyo ug mosumite og report sa mga namatikdang kalapasan aron mahatagan og tukmang aksyon sa hingtungdang mga ahensya.
Gihangyo usab ang publiko sa pagtabang pinaagi sa pag-report sa ilegal nga pagpasulod sa baboy ug sa pagbaligya og imported pork meat ug pork products nga supak sa Provincial Ordinance No. 2021-062R (26th SP). Mahimong itaho ang mga reklamo sa Provincial Veterinary Office pinaagi sa ilang hotline number nga 0917-146-9223
Photo courtesy: LGU Bukidnon










