Gipahigayon sa Department of Science and Technology o DOST-Zamboanga Sibugay, sa pakigtambayayong sa Provincial Local Government Unit sa Zamboanga Sibugay, ang duha ka adlaw nga Capacity Development Training on Futures Thinking sa lungsod sa Ipil niaging adlaw.
Tumong sa maong pagbansay nga mapalambo ang kahibalo ug pagsabot sa mga partisipante kabahin sa Futures Thinking ug Strategic Foresight, isip pamaagi aron maandam ang lokal nga panggamhanan sa posibleng mga kausaban, hagit ug oportunidad sa umaabot.
Mitambong niini ang mga representante gikan sa probinsyal ug lokal nga panggamhanan, nagkadaiyang institusyong pang-akademiko, national government agencies ug mga kaabag nga sektor. Ang kalihokan gipangunahan sa DOST-ZSP kauban ang Provincial Science, Technology and Innovation Council o ProSTIC.
Pinaagi sa mga diskusyon, group exercises, horizon scanning, trend analysis, backcasting ug scenario-building, nahatagan ang mga partisipante og kahigayonan sa pag-ila sa nag-usbong nga mga uso ug mga hinungdan nga posibleng makaapekto sa kaugmaon sa probinsiya.
Gipangunahan ang mga kalihokan ni Mr. Yhebron J. Lagud sa Jose Rizal Memorial State University o JRMSU isip resource speaker. Gilauman nga pinaagi niini, mas mapalig-on ang pagplano ug paghimog mga desisyon sa panggamhanan nga nakabase sa dugayng panan-aw ug andam sa mga posibleng kausaban sa umaabot.










