Mipatigbabaw ang Benedicto College Cheetahs batok sa University of Southern Philippines Foundation kon USPF Panthers human nila kining gipaluhod, 72-60, sa CESAFI Season 26 men’s basketball tournament sa Cebu Coliseum.
Human sa dikit nga unang duha ka quarter, mibawi ang Cheetahs sa ikatulong quarter pinaagi sa kusog nga 15-6 run nga nakapalapad sa ilang labaw ngadto sa 48-37, sa wala pa nila kini gipadako ngadto sa 59-40 pagsulod sa fourth quarter.
Misidlak alang sa Benedicto si rookie Alcher Pabalan nga nakatampo og 18 puntos, pito ka rebounds, tulo ka steals ug duha ka assists. Misunod si Den Rick Orgong nga adunay 13 puntos, samtang si Jhunrel Dagatan nakadugang og 12 puntos ug si Junil Bulan adunay 10 puntos.
Dugang nga labaw sa Cheetahs ang ilang bench players nga nakatampo og 46 puntos, layo sa 21 puntos nga nakuha sa mga reserbang magdudula sa USPF. Bunga sa kadaugan, misaka sa 10-2 ang baroganan sa Benedicto College nga nagpabiling nanguna sa standings, samtang nahulog sa 2-10 ang USPF Panthers.
Bisan pa sa maayong performance ni Peter John Peteros nga nakapuntos og 27 alang sa USPF, wala gihapon kini nakalikay sa kapildihan.
Photo Courtesy: Instagram










