Mikulit og kasaysayan sa musika sa Asya ang Pilipinas human midaog ang Filipino singer nga si Carmelle Collado isip unang kampiyon sa inaugural edition sa Eurovision Song Contest Asia 2026 nga gipahigayon sa Bangkok, Thailand niadtong Nobyembre 14.
Nakuha ni Carmelle ang kinatibuk-ang 211 puntos pinaagi sa iyang orihinal nga kantang “Sobra-Sobra,” diin nakadawat siya og 93 puntos gikan sa professional juries ug 118 puntos gikan sa audience vote. Kini maoy nakapahimutang kaniya sa unang pwesto taliwala sa 11 ka nasod nga miapil sa kompetisyon.
Misunod sa ikaduhang pwesto ang representante sa host country nga Thailand, ang duo nga MANG x DAOU, samtang ikatulo ang Vietnam nga girepresentahan ni Tóc Tiên.
Sa iyang performance, gipakita ni Carmelle ang iyang abilidad sa pagkanta, pag-rap ug pagsayaw. Matod sa singer, ang iyang kantang “Sobra-Sobra” naghatag og mensahe kabahin sa empowerment sa kababayen-an ug usa usab ka pasidungog sa tanang Pilipina.
Dili bag-o sa dagkong singing competition si Carmelle. Nahimong first runner-up siya sa ika-upat nga season sa The Voice Kids Philippines, nakadaog sa Tawag ng Tanghalan: The School Showdown niadtong 2025, ug miapil usab sa Pinoy Big Brother.
Ang maong kompetisyon mao ang unang Asian edition sa Eurovision Song Contest, nga nagtigom sa mga performer gikan sa 11 ka nasod aron ipakita ang nagkadaiyang talento, kultura ug musika sa rehiyon.
Photo courtesy: eurovisionasia/IG










