Sugdan sa Philippine Sports Commission (PSC) sa pagsulod sa tuig 2027 ang pagpaayo sa Rizal Memorial Stadium human mapormal ang Memorandum of Agreement (MOA) tali sa PSC, Philippine Football Federation (PFF) ug FIFA. Gipirmahan ang kasabutan nila ni FIFA President Gianni Infantino, Executive Secretary Ralph Recto, PSC Chairman Patrick Gregorio ug PFF President John Gutierrez.
Ubos sa kasabutan, mohatag ang FIFA og 25 milyon ka dolyares o kapin sa 1.6 bilyong piso alang sa pagpalambo sa sports sa Pilipinas. Gikan niini, 13 milyon ka dolyares o kapin sa 831 milyong piso ang igahin alang sa dakong rehabilitasyon sa Rizal Memorial Football Stadium, nga walay gastuhon ang gobyerno sa maong proyekto.
Matod ni Infantino, mahimong usa ka bililhong kabtangan sa nasud ang Rizal Memorial Stadium tungod kay mahimong gamiton kini sa nagkalain-laing atleta gikan sa ubang nasud alang sa ilang mga duwa. Gilauman usab nga mas mapalambo niini ang sports sa Pilipinas ug mahimong garbo sa matag Pilipino ang maong pasilidad.
Photo courtesy:Philippine Football Federation










