Gi-turnover na sa unom ka tulonghaan sa probinsya sa Surigao del Norte ang Walk-Through Metal Detector nga gipondohan sa kagamhanang panlalawigan. Aron mapalig-on ang seguridad sa mga estudyante ug personahe sa mga eskuwelahan.
Matud ni Vice Governor Geed Gokiangkee, kabahin kini sa proactive nga lakang sa probinsya aron masiguro ang kaluwasan sa mga estudyante ug personahe pinaagi sa pagpugong daan sa posibleng pagsulod sa mga delikado ug gidili nga mga butang sulod sa mga eskuwelahan.
Lakip sa mga nakadawat sa maong kagamitan ang Cabrera-Altres National High School, Mat-i National High School, Caraga Regional Science High School, Surigao City National High School, Surigao del Norte National High School ug Taft National High School.
Gikan sa pundo sa kagamhanang panlalawigan ang gigamit sa pagpalit sa mga Walk-Through Metal Detector nga gamiton sa pagsusi sa mga tawo nga mosulod sa maong mga eskuwelahan.
Samtang, nagpaabot pa si Vice Governor Gokiangkee sa rekomendasyon gikan sa Department of Education o DepEd kalabot sa uban pang mga eskuwelahan nga mahimong hatagan sa maong kagamitan aron mapalapdan pa ang programa sa pagpalig-on sa seguridad sa mga tulonghaan sa probinsya.
