Gidakop sa kapulisan ang usa ka 46-anyos nga babaye nga namaligya og prutas human ipatuman ang duha ka warrant of arrest batok kaniya tungod sa mga kasong Grave Threats ug Grave Oral Defamation sa Barangay Masulog Uno, Canlaon City, Negros Oriental, alas 6:07 sa gabii niadtong Nobyembre 9, 2026.
Giila ang dinakpan sa alyas nga Rose, minyo ug residente sa maong barangay. Sumala sa report, ang Tracker Team sa San Carlos City Component Police Station (CCPS), ubos sa pagpanguna ni PLTCOL Nazer P. Canja, Chief of Police, nagpahigayon og Manhunt Charlie Operation nga misangpot sa pagkadakop sa babaye.
Ang duha ka warrant of arrest gi-isyu ni Judge Peter Z. Parco sa Municipal Trial Court in Cities (MTCC), San Carlos City, nga may kinatibuk-ang girekomendar nga piyansa nga otso mil pesos o ₱8,000.
Human sa pagdakop, gipahibalo ang babaye sa iyang mga katungod ubos sa Miranda Doctrine ug Anti-Torture Law sa pinulongang iyang nasabtan.
Sa pagkakaron, anaa na siya sa kustodiya sa San Carlos CCPS alang sa hustong disposisyon.
Photo courtesy: San Carlos CCPS
