Gitan-aw na sa lokal nga panggamhanan sa probinsya sa Surigao del Norte ug sa World Surf League o WSL ang sunod nga mga lakang alang sa pagbalik sa Championship Tour sa Siargao sa tuig 2027.
Kini human sa nahimong panagtagbo tali sa mga opisyal sa probinsya ug sa WSL, diin ilang gibalik-balikan ang mga kalampusan sa ilang panagtambayayong, lakip na ang mga posibilidad ug pagpangandam alang sa umaabot nga dagkong kompetisyon sa surfing.
Gipadayag usab sa probinsya ang ilang dakong pasalamat sa WSL tungod sa padayon nga pagsalig ug pagpili sa Siargao isip usa sa mga dapit nga mahimong sentro sa internasyonal nga surfing competition.
Bisan pa man og daghan pa ang angay planohon ug trabahoon, nagpahayag ang probinsya sa ilang kahinam nga mapalambo pa ang sunod nga yugto sa surfing sa Siargao, nga gilaom nga maghatag og dugang oportunidad sa turismo, panginabuhian ug ekonomiya sa mga Surigaonon.
Gilaoman nga mas mahimong makahuluganon ang pagbalik sa WSL Championship Tour sa 2027, dili lamang sa mga surfer kondili lakip usab sa tibuok isla sa Siargao.
Photo courtesy: Gov. Lyndon Barbers
