Mokabat sa ₱489,600 nga kantidad sa gidudahang shabu ang nakompiskar sa Philippine Drug Enforcement Agency o PDEA Caraga atol sa buy-bust operation, sa Purok 4, Barangay Obrero, dakbayan sa Butuan.
Gipahigayon ang operasyon niadtong nakalabay nga adlaw, nga miresulta sa pagdakop sa usa ka 38-anyos nga lalaki nga giila lamang sa alyas nga Benjie, ulitawo ug residente sa maong lugar.
Narekober gikan sa dinakpan ang mokabat sa 72 gramos sa gidudahang shabu, lakip ang buy-bust money ug uban pang mga ebidensiya.
Atubangon sa suspek ang kasong pagbaligya ug ilegal nga pagpanag-iya sa gidudahang ilegal nga droga, ubos sa Sections 5 ug 11 sa Republic Act 9165, o Comprehensive Dangerous Drugs Act of 2002, nga giusab pinaagi sa RA 10640.
Sa pagkakaron, anaa na sa kustodiya sa PDEA Caraga ang dinakpan alang sa tukmang proseso sa balaod.
