Nakadawat og rescue vehicles ang unom ka barangay sa dakbayan sa Cabadbaran, sa probinsya sa Agusan del Norte, samtang tulo ka Barangay Community Emergency Response Team substations ang gitagaan og ambulansya aron mapalig-on ang ilang kapasidad sa pagtubag sa mga emerhensiya ug kalamidad.
Pormal nga giturn-over ang mga sakyanan atol sa Fourth Quarter Full Council Meeting sa Cabadbaran City Disaster Risk Reduction and Management Council (CDRRMC), nga gipahigayon sa Social Hall sa People’s Government Center.
Gipangulohan ni City Administrator Francis Denise C. Amante ang maong tigom diin gihisgotan ang nag-unang mga lakang alang sa disaster preparedness, risk reduction ug emergency response sa dakbayan.
Lakip sa mga gihisgotang agenda ang Supplemental Local Disaster Risk Reduction and Management Fund (LDRRMF) Investment Plan alang sa 2027, mga polisiya sa disaster risk reduction and management nga nagkinahanglan og aksyon sa lehislatura, ug ang accomplishment report sa CDRRMC.
Ang unom ka barangay nga nakadawat og rescue vehicles mao ang Poblacion 1, Poblacion 8, Poblacion 11, Calibunan, Kauswagan ug Soriano. Samtang ang mga CERT substations sa Barangay Bayabas, Concepcion ug Calamba maoy nakadawat sa mga ambulansya.
Pinaagi sa maong programa, gipalig-on sa lokal nga kagamhanan ang kaandam sa mga barangay sa pagtubag sa mga emerhensiya, lakip na ang dali nga paghatag og tabang sa mga residente nga maapektuhan sa kalamidad ug uban pang insidente.
