Giklasipikar nga unhealthy ang lebel sa Particulate Matter 2.5 sa hangin sa syudad tungod sa haze base sa air quality update sa City Disaster Risk Reduction and Management Office kun CDRRMO pasado alas 9:38 sa kagabii, Oktubre 23, 2026.
Samtang ubos usab ang lebel sa Particulate Matter 10. Ang PM2.5 naglangkob sa gagmay kaayong partikulo nga mahimong masuyop ngadto sa baga ug makasulod sa dugo nga posibleng maglisod sa pagginhawa ug makapasamot sa mga sakit sa baga ug kasingkasing.
Giawhag ang mga residente nga limitahan ang pagpabilin sa gawas, ilabina ang mga bata, tigulang, mabdos ug mga adunay sakit sa kasingkasing. Girekomenda usab ang paggamit og N95 o KN95 nga mask kung mogawas ug ang pagsira sa mga bintana ug pultahan kon taas ang polusyon sa hangin.
Gipahinumdoman ang publiko nga likayan ang pagsunog sa basura ug uban pang materyales nga makadugang sa aso ug kanunay nga magmonitor sa mga opisyal nga pahibalo bahin sa kalidad sa hangin aron mapanalipdan ang panglawas.
