Gisumite na sa administrasyon ni Gobernador Reynaldo Tamayo Jr. ang gisugyot nga ₱4.458-bilyong badyet sa probinsya sa South Cotabato alang sa tuig 2027 ngadto sa Sangguniang Panlalawigan.
Matud ni Atty. Sylvie Blanche Tandog, Secretary to the Sanggunian, nadawat ang budget proposal niadtong Oktubre 12, 2026, ug girefer kini sa Committee on Budget and Appropriations human gipresentar atol sa regular session sa Provincial Board sa maong adlaw.
Gilauman nga sugdan sa Nobyembre ang detalyadong deliberasyon sa badyet sa matag departamento, samtang gitumong nga maaprobahan kini sa dili pa matapos ang Disyembre 2026.
Sa iyang mensahe ngadto sa Provincial Board, gipasiugda ni Tamayo ang dugang nga pagpatuman sa mga prayoridad nga programa sa probinsya, lakip ang libreng edukasyon ug pagpapaospital, ingon man ang Consolidated Rice Farming and Mechanization program.
Sa kinatibuk-ang gisugyot nga badyet nga ₱4,458,623,928, mokabat sa ₱4.430 bilyon ang igahin alang sa general fund sa probinsya, nga motabon sa mga serbisyo sa social welfare, medikal ug panglawas, ug nagkadaiyang proyekto sa imprastraktura.
Samtang, ₱28 milyon ang gitagana alang sa local economic enterprise sa probinsya. Kabahin usab sa fiscal plan ang pagpalig-on sa koleksiyon sa buhis, pagmodernisar sa revenue collection ug pagpalapad sa lokal nga tinubdan sa kita aron mamenosan ang pagsalig sa National Tax Allotment o NTA.
Gihatagan usab og gibug-aton sa administrasyon ang transparency ug accountability sa paggamit sa pondo sa publiko, diin giawhag ang mga representante sa Civil Society Organizations o CSOs nga motambong ug motan-aw sa technical budget hearings.
Ang gisugyot nga badyet paga-usisaon ug pagahisgotan pa sa Sangguniang Panlalawigan sa dili pa kini pinal nga maaprobahan ug mahimong basihan sa paggasto sa gobyerno sa South Cotabato alang sa 2027.
Photo courtesy:Provincial Government of South Cotabato
