Nag-apod-apod og 1.5 milyong semilya sa locon ang Provincial Fisheries Office sa Zamboanga Sibugay o PFO-ZSP, ubos sa Bureau of Fisheries and Aquatic Resources Region 9, ngadto sa mga fishpond operators sa probinsya niadtong nakalabay nga adlaw.
Tumong sa maong inisyatibo nga suportahan ang panginabuhian sa mga nagdumala sa palaisdaan ug mapalambo ang lokal nga produksyon sa aquaculture o pagpadako sa mga lamang-dagat ug isda sa kontroladong palibot.
Sumala sa programa, kabahin kini sa padayong paningkamot sa BFAR nga mapalig-on ang sektor sa pangisdaan pinaagi sa paghatag og suporta sa mga fishpond operators aron mapalambo ang ilang produksyon ug madugangan ang oportunidad sa panginabuhian.
Gilaoman nga ang pag-apod-apod sa semilya sa locon makatabang sa pagpalambo sa lokal nga aquaculture ug pagpalig-on sa panginabuhian sa mga benepisyaryo. Pinaagi niini, nagpadayon ang paningkamot sa BFAR ug PFO-ZSP nga mapalambo ang sektor sa pangisdaan ug mapalambo ang malungtarong produksyon sa Zamboanga Sibugay.
