Pormal nang giturn-over ang bag-ong duha ka andana nga Day Care Center sa Barangay Canacan, lungsod sa Kabasalan, Zamboanga Sibugay, aron magsilbing luwas ug hapsay nga lugar alang sa pagkat-on ug sayong edukasyon sa mga kabataan.
Gitugyan ang maong pasilidad ngadto kang Barangay Captain Abdawa Usop ug sa mga opisyal sa barangay. Gilaoman nga pinaagi niini, mas mapaayo ang serbisyo sa pag-atiman ug pag-edukar sa mga bata, ilabina sa ilang unang mga lakang sa pagkat-on.
Gipasalamatan ang paningkamot ni Governor Ann K. Hofer sa pagpalambo sa mga pasilidad ug serbisyo alang sa katawhan sa probinsya. Mitambong ug misuporta usab sa kalihokan sila ni Vice Governor RicRic Olegario, Provincial Engineer Engr. Cristopher Lazo, ug Kabasalan Municipal Administrator Atty. Lycel Castor-Tan.
Gilaoman nga ang bag-ong Day Care Center makatampo sa pagpalig-on sa edukasyon sa mga kabataan sa Barangay Canacan. Pinaagi sa panaghiusa sa provincial government, lokal nga pangagamhanan ug mga opisyal sa barangay, nagpadayon ang mga paningkamot nga mahatagan og mas maayong serbisyo ug kaugmaon ang sunod nga henerasyon sa Zamboanga Sibugay.
