Pormal nang gipirmahan ang kasabutan alang sa ₱187.9 milyon nga farm-to-market road project sa lungsod sa Carmen, North Cotabato, niadtong Oktubre 14, 2026.
Gihimo ang seremonyas sa pagpirma sa Implementation Management Agreement o IMA sa Amas Research and Experiment Station sa Kidapawan City.
Naglangkob ang proyekto sa pagkongkreto sa dalan gikan sa Sitio Campo, Barangay Malapag padulong sa Barangay Macabenban, nga adunay gitas-on nga 7.038 kilometros ug nagkantidad og P187,985,000.
Ang kasabutan gipirmahan sa Department of Agriculture Regional Field Office 12, ubos sa pagpangulo ni Regional Director John B. Pascual, ug sa pangagamhanang probinsyal nga gipangulohan ni Governor Emmylou “Lala” J. Taliño-Mendoza.
Gilauman nga ang proyekto makapasayon sa pagbiyahe ug pagdala sa mga produktong pang-agrikultura, ingon man makapalig-on sa koneksyon sa mga mag-uuma ngadto sa mga merkado.
Pinaagi niini, gilauman nga mas mapalambo ang panginabuhian sa mga mag-uuma ug ang kalamboan sa komunidad.
Photo courtesy: Provincial Government of Cotabato
