Gihatag na sa City Government of Kidapawan ang kapin sa 55 ka handheld radios ngadto sa mga opisyal sa barangay, 911 personnel, Special Action Team (SAT), ug City Disaster Risk Reduction and Management Office (CDRRMO) niadtong Oktubre 12, 2026. Tumong niini nga mapalambo ang komunikasyon tali sa mga barangay ug security personnel, ilabina sa panahon sa emerhensiya ug mga insidente nga nagkinahanglan og dali nga pagresponde.
Kabahin usab sa pagpanagtag ang pagbansay nga gipangulohan ni Kidapawan City PNP Chief PLTCOL Argie Celeste bahin sa hustong paggamit sa mga kagamitan. Matud ni Celeste, makatabang ang handheld radios sa pagreport sa sitwasyon sa matag barangay, pagkoordinar sa mga concerned agencies, ug pagpatuman sa lockdown sa mga entrada ug gawasan sa siyudad kon gikinahanglan aron mapalig-on ang kalinaw ug seguridad.
