Gi-awhag ni Peter Gerard Buencamino, Head sa Tricycle Franchising and Regulation Division (TFRD), ang mga drayber sa bao-bao ug tricycle nga gustong mag-aplay og prankisa nga moduol sa ilang opisina ug magdala sa tanang gikinahanglang dokumento.
Kini subay sa programa sa buhatan nga nag-abli og 800 ka slots alang sa mga aplikante nga gustong makakuha og prankisa, diin gilangkoban sa 500 ka slots alang sa mga bao-bao, samtang 300 usab ang gigahin alang sa mga tricycle.
Matod pa ni Buencamino, kapin na sa 200 ka drayber ang nag-aplay alang sa prankisa sa bao-bao, samtang kapin 20 na usab ang mga aplikante alang sa tricycle.
Kabahin niini, giawhag ang tanang interesado nga drayber nga mosunod sa hustong proseso sa pag-aplay ug siguruhong kompleto ang ilang mga dokumento aron malikayan ang posibleng pagkalangan sa pagproseso sa ilang mga aplikasyon.
