Nasikop sa kapulisan ang usa ka 20-anyos nga lalaki human giingong nangulata sa Purok 10-A, Mato-og, Barangay Kiwalan, Iligan City, niadtong nakalabay nga adlaw.
Base sa report sa Iligan City Police Station 3 (ICPS-3), diha-diha silang niresponde sa maong lugar human makadawat sa report kalabot sa pagpangulata. Malampusong nadakpan ang suspek dihang gitudlo kini sa biktiima ug napugngan sa mga residente sa maong lugar.
Sa inisyal nga imbestigasyon sa kapulisan, nagkuha og sugnod ang biktima gikan sa uma ug gidala kini pauli sa dihang iyang nasugatan ang suspek. Giingong walay klarong hinungdan, kalit lang kining giatake sa suspek pinaagi sa pagsumbag ug pagpangulata. Tungod kay nagkarga og sugnod ang biktima, wala kini nakadepensa sa iyang kaugalingon ug nakaangkon og daghang samad sa nagkalainlaing bahin sa lawas.
Gidala una ang biktima sa ICPS-3 sa wala pa kini gihatod sa ambulansiya sa Iligan City Disaster Risk Reduction and Management Office (ICDRRMO) ngadto sa Dr. Gregorio T. Lluch Memorial Hospital sa Pala-o, Iligan City, alang sa medikal nga pagtambal. Samtang, nagtingkagol na sa prisohan ang suspek alang sa tukmang lakang ug Giandam na ang reklamo kalabot sa physical injuries batok kaniya.
