Nasikop sa kapulisan ang usa ka 28-anyos nga lalaki human kini makit-an nga nagtago sa rooftop sa usa ka appliance store sa National Highway corner Bonifacio Street, Barangay Magugpo Poblacion, Tagum City, sayong kabuntagon niadtong Oktubre 1, 2026.
Nagsugod ang insidente mga alas 11:39 sa gabii niadtong Septiyembre 30, 2026, human makadawat og impormasyon ang Tagum City Police Station bahin sa usa ka lalaki nga nakita sulod sa maong establisemento.
Gipahibalo dayon ang manager nga si alyas “Andrew,” kinsa miadto sa lugar uban sa responding police officer aron beripikaron ang nahitabo. Sa ilang pag-abot, nakit-an nga pinugos ug nadaot ang vault sa establisemento.
Gibanabana usab nga nawala ang 30 mil pesos nga cash ug pito ka iPhone nga mokabat sa 150 mil pesos ang kinatibuk-ang kantidad, samtang naputol ang main electrical power supply sa establisemento. Miadto dayon ang kapulisan sa clearing operation uban sa koordinasyon sa SWAT Team sa 1st Davao Norte Provincial Mobile Force Company.
Atol sa operasyon, nakit-an ang lalaki nga nagtago sa rooftop ug nasikop mga alas 2:55 sa kaadlawon. Giila ang suspek sa alyas “Jemuel,” 28 anyos, ulitawo ug residente sa Barangay Magugpo West, Tagum City. Narekober gikan kaniya ang 17 mil 550 pesos nga cash ug mga dokumento nga gituohang may kalabotan sa maong establisemento. Gidala siya uban sa mga narekober nga butang sa Tagum City Police Station alang sa hustong dokumentasyon, imbestigasyon ug pagproseso sa kaso.
Photo Courtesy: Tagum PNP
