Giawhag ni Cebu City Councilor Nyza “Nice” Archival ang 80 ka mga barangay sa Dakbayan sa Sugbo nga regular nga manglimpyo ug magmintinar sa ilang mga sports center, ilabi na sa mga kasilyas, ug siguruhong adunay igong suplay sa tubig.
Sa iyang resolusyon nga giduso sa konseho, giingon ni Archival nga dako ang pondo sa gobyerno alang sa pagtukod ug pagpaayo sa mga sports center ug multipurpose facilities.
Matud pa niya, adunay pipila ka pasilidad nga kulang sa pag-atiman, ilabi na sa mga kasilyas nga hugaw ug walay hustong sanitasyon, nga mahimong maghulga sa kahimsog sa publiko.
Gihangyo usab ni Archival ang koordinasyon sa mga Barangay Council ug Association of Barangay Captains (ABC) aron makahimo og hiniusang standards sa pagmintinar, lakip ang hustong budget alang sa pagpanglimpyo ug pagsiguro sa suplay sa tubig.
Mahimo usab nga mahimong tinubdan sa kita sa barangay ang mga sports center pinaagi sa legal nga paggamit o pag-abang niini.
Photo Courtesy: The Freeman
