Mikabat sa 20 ka wanted persons, lakip ang duha nga nalista isip Regional Most Wanted Persons (MWPs), ang nadakpan sa managlahing manhunt operations sa nagkadaiyang lugar sa Caraga Region niadtong Septiyembre 30.
Sumala kang PBGen Rolindo M. Suguilon, Regional Director sa Police Regional Office 13, pinakadaghan nga nadakpan ang Butuan City Police Office nga mikabat og pito ka wanted persons.
Gisundan kini sa Agusan del Sur Police Provincial Office nga nakadakop og lima, samtang upat ang nadakpan sa Surigao del Norte Police Provincial Office. Duha usab ka wanted persons ang matag nadakpan sa Surigao del Sur ug Agusan del Norte Police Provincial Offices.
Lakip sa nadakpan si alyas “Donlyn,” 33 anyos, residente sa Barangay San Isidro, Tandag City, Surigao del Sur. Nasikop si alyas “Donlyn” pinaagi sa hiniusang operasyon sa mga personnel sa Barobo Municipal Police Station, 1st Surigao del Sur Provincial Mobile Force Company, Regional Mobile Force Battalion 13, Surigao del Sur Provincial Intelligence Unit, Regional Intelligence Division 13, ug sa Philippine Army.
Base sa kapulisan, si alyas “Donlyn” giila isip Vice-Commanding Officer ubos sa Sub-Regional Sentro de Grabidad Southland, North Eastern Mindanao Regional Committee. Naka-ranggo siya isip numero tres sa listahan sa Regional Most Wanted Persons sa PRO 13.
Gipangita siya tungod sa mga warrant of arrest nga giisyu sa korte may kalabotan sa kaso sa murder ug duha ka kaso sa attempted murder. Matud ni PBGen Suguilon, dako ang natampo sa padayong suporta ug kooperasyon sa publiko sa kalampusan sa mga operasyon batok sa mga wanted persons.
Gipasalig usab sa opisyal nga magpadayon ang PRO 13 sa pagpatuman sa mga lakang aron mapadayon ang kalinaw ug kahapsay sa tibuok rehiyon.
Photo courtesy: PRO13
