Naturn over na ngadto sa Cabinuangan Bayanihan SLP Association sa Lungsod sa New Bataan ang Tables and Chairs Rental Livelihood Project atol sa pormal nga paglunsad niini Septyembre 29, 2026.
Kabahin kini sa Sustainable Livelihood Program o SLP sa Department of Social Welfare and Development o DSWD, nga nagtinguha sa paghatag og dugang panginabuhian ug oportunidad sa mga benepisyaryo pinaagi sa pagpalambo sa ilang kaugalingong association.
Nakatambong sa maong kalihukan sila Vice Mayor Elfa Digaynon, mga Konsehal Evi Mangubat ug Serge Mabasa, IPMR Jonah Edlay, ug Jun Tuyor isip representante ni Governor Raul Mabanglo ug Congresswoman Maricar Zamora-Mabanglo. Girepresentahan usab sa kalihukan ang DSWD pinaagi kang Project Development Officer II Jennie Mae Gomez.
Pinaagi sa maong livelihood project, gipaabot nga makadugang kini sa kita sa mga miyembro sa association samtang mapalig-on ang ilang organisasyon ug kapasidad sa pagdumala sa panginabuhian.
