Giduso ni Councilor Richard Atendido, Chairperson sa Public Safety Committee sa Sangguniang Panlungsod sa General Santos City, ang draft ordinance nga mag-regulate sa paggamit ug pagdala og backpack sa mga estudyante, magpugong sa pagpasulod o pagtago sa armas ug uban pang delikadong butang, ug magpalig-on sa seguridad sulod sa mga eskwelahan.
Gihisgutan ang maong panukala atol sa 53rd Regular Session sa Sangguniang Panlungsod niadtong Septiyembre 29, 2026, uban nila Department of Education GenSan Superintendent Dr. Isagani Dela Cruz ug Deputy City Director sa General Santos City Police Office PLt. Col. Josemarie Simangan.
Gisentro sa diskusyon ang mga nai-report nga online threats batok sa mga eskwelahan ug ang mga preventive measure aron mapanalipdan ang mga estudyante, magtutudlo ug school personnel.
Lakip sa mga mekanismo nga gisugyot ang mas estriktong pag-monitor sa mga backpack, pagpugong sa pagpasulod sa armas ug uban pang gidili nga butang, pagpalig-on sa security protocols, ug paggamit sa CCTV monitoring sulod sa mga campus.
Tumong sa panukala nga mapalig-on ang preventive security measures sa mga eskwelahan ug malikayan ang mga insidente nga mahimong maghulga sa kaluwasan sa school community.
Photo courtesy: Richard Atendido fb page
