Sikop sa Tupi Municipal Police Station ang usa ka 27-anyos nga lalaki human giakusahan nga nagpailang miyembro sa Sangguniang Kabataan o SK ug barangay staff aron mangayo og kontribusyon alang sa umaabot nga Timpoyog Festival.
Nahitabo ang insidente pasado alas-dos sa hapon niadtong Setyembre 28 sa Barangay Poblacion, Tupi, South Cotabato.
Sumala sa imbestigasyon, giduol sa suspek nga si alyas “Bogoy” ang usa ka 18-anyos nga estudyante ug nangayo og kontribusyon alang sa thematic dance event sa festival. Apan nagduda ang estudyante sa iyang pagpaila ug gikonsulta kini sa usa ka barangay kagawad.
Sa barangay hall, gikumpirma sa kagawad ug SK Chairperson nga si alyas “Gilda” nga dili miyembro o awtorisadong representante sa SK ug barangay ang maong suspek. Narekober gikan kaniya ang brown pouch nga adunay ₱800 nga cash.
Sa pagkakaron, gidala na ang suspek sa Tupi Municipal Police Station ug giandam ang pagsaka og kaso nga usurpation of authority ug estafa batok kaniya.
