Nag-apod-apod ang Provincial Government of Sarangani og nagkalain-laing agricultural ug marine assistance ngadto sa mga lokal nga mag-uuma ug mananagat niadtong Septiyembre 29, 2026, atol sa turnover ceremony nga gipangulohan ni Gobernador Rogelio “Ruel” Pacquiao sa Alabel, Sarangani.
Gibanabana nga 25 ka farmer ug fisherfolk associations ang nakadawat sa mga agricultural inputs sama sa coffee dehuller ug grinder, cacao dehuller, binhi sa humay, mais ug utanon, seedlings sa kape ug abaka, abono, insecticide, sprayer, sprinkler, storage drums ug uban pang farming tools. Nakadawat usab ang mga mananagat og tilapia fingerlings, fishing gear ug post-harvest equipment.
Gipasalig ni Gobernador Pacquiao nga magpadayon ang suporta sa provincial government sa sektor sa agrikultura ug pangisdaan, ilabina pinaagi sa regular nga konsultasyon aron direktang madungog ang panginahanglan sa mga kooperatiba ug mga benepisyaryo.
Ang maong programa gipadagan sa Office of the Provincial Agriculturist ubos sa pagdumala ni officer-in-charge Jerwin Balbino, pinaagi sa Food Production Enhancement Project. Tumong niini nga mapalambo ang produksyon sa isda ug mga pananom, madugangan ang kita sa mga panimalay ug mapalig-on ang malungtarong panginabuhian sa mga komunidad sa tibuok Sarangani.
Nagpasalamat usab ang mga benepisyaryo sa nadawat nga ayuda ug mipasalig nga gamiton kini sa hustong paagi aron mapalambo ang ilang panginabuhian ug makatampo sa pagpalig-on sa produksyon sa pagkaon sa probinsya.
Photo courtesy:Sarangani Provincial Office
