Nagpahigayon ang President Roxas Municipal Police Station, og information drive alang sa mga ginikanan nga nagtutok sa seguridad sa mga eskwelahan ug mga isyu nga mahimong makaapekto sa kaluwasan sa mga estudyante. Lakip sa gihisgutan ang kampanya batok sa ilegal nga droga, cyber safety ug responsableng paggamit sa internet, pagpugong sa pagdani sa mga kabatan-onan ngadto sa ekstremistang ideya pinaagi sa online ug ang Anti-Bullying Act.
Pinaagi sa maong kalihokan, gihatagan og dugang kahibalo ang mga ginikanan kabahin sa ilang papel sa pagpanalipod sa mga anak batok sa mga posibleng hulga sulod ug gawas sa eskwelahan, lakip na ang mga peligro nga mahimong masinati online.
Samtang, gidasig ang mga ginikanan nga mahimong aktibong kauban sa paggiya sa mga bata sa husto ug luwas nga paggamit sa digital platforms, pag-ila sa posibleng peligro ug pagreport sa tukmang otoridad kung adunay makitang hulga o kahimtang nga makadaot sa mga estudyante. Tumong sa maong paningkamot ang paghimo og luwas, malinawon ug suportadong palibot alang sa matag bata o estudyante.
