Nagpahigayon ang BJMP Regional Office 12, og random drug testing human sa flag ceremony sa Prime Regional Government Center, Barangay Carpenter Hill, Koronadal City. Gipangulohan ni Regional Director JCSUPT Erwin Kenny P. Ronquillo ang kalihokan ug siya mismo ang unang miagi sa maong testing, gisundan sa Command Group, Chiefs of Offices, personnel ug JO1 trainees.
Miabot sa 130 ka partisipante ang gipailalom sa drug testing, diin 81 ang personnel ug 49 ang trainees. Gipasiugdahan sa Operations Division sa BJMP Regional Office 12 ang kalihokan, ubos sa pagdumala sa mga representante sa Philippine Drug Enforcement Agency o PDEA ug gipahigayon sa Health Service Division.
Base sa resulta, walay nakit-ang nagpositibo sa illegal nga droga sa tanang gipailalom sa screening. Pinaagi niini, gipakita sa BJMP 12 ang padayong paningkamot sa pagmintinar sa disiplina, transparency ug drug-free nga workplace, samtang gihatagan usab og importansya ang kahimsog, integridad ug kaayohan sa mga personnel ug trainees.
