Kapin 250 ka residente sa Barangay Dawan ang nakadawat og libreng serbisyo sa gobyerno niadtong Setyembre 29, 2026, isip kabahin sa pagtimaan sa unang anibersaryo sa Serbisyo Para sa Tanan Caravan. Pinaagi niini, gipadayon ang paningkamot nga mas mapaduol sa mga barangay ang mga serbisyo nga gikinahanglan sa katawhan.
Lakip sa mga serbisyong gipanghatag mao ang medikal, legal, ug sosyal nga tabang aron dili na kinahanglan pa sa mga residente ang pag-adto sa sentro sa syudad alang sa ilang mga panginahanglan.
Sa pagpahigayon sa programa, mokabat na sa kapin 3,000 ka residente gikan sa nagkalain-laing lugar sa dakbayan ang nakabenepisyo sa Serbisyo Para sa Tanan Caravan ubos sa panguna ni Mayor Joel Mayo Almario. Dugang suporta usab ang gipakita sa opisina ni 2nd District Congressman Cheeno Miguel Almario pinaagi sa pag-apod-apod og mga food packs, wheelchair, ug sungkod ngadto sa mga benepisyaryo.
Gilauman nga pinaagi sa padayon nga pagdala sa mga serbisyo ngadto mismo sa mga komunidad, mas daghang residente ang maabot ug matabangan sa mga programa sa gobyerno.
Photo courtesy: City of Mati
