Dakpan sa Davao City Police Office (DCPO) ang usa ka high-value individual (HVI) sa gihimong buy-bust operation niadtong nakalabayng adlaw didto sa Barangay Ma-a. Nakumpiska gikan sa operasyon ang gibana-banang 10.50 gramos sa gituohang shabu nga adunay standard drug price nga P71,400.
Gipahigayon ang operasyon alas-4:30 sa hapon sa Purok 26, Diversion Road duol sa Bakingan Vulcanizing Shop. Gipangulohan kini sa Police Station 16 (Ma-a) ubos sa pagdumala ni PMAJ PHILIP DAVE A. UDDIN, sa suod nga koordinasyon sa Philippine Drug Enforcement Agency Region XI (PDEA XI).
Gidayeg ni DCPO City Director PCOL PETER BAUZON MADRIA ang mga operating unit tungod sa paspas nga paglihok ug malampusong operasyon. Matud sa DCPO, padayon nilang palig-onon ang intelligence-driven campaigns batok sa ilegal nga droga isip kabahin sa paningkamot nga mapadayon ang kaluwasan ug kalinaw sa Davao City.
Ang nakumpiskang mga ebidensya giturn-over alang sa hustong dokumentasyon ug disposisyon subay sa gitakdang proseso. Ang insidente nagpasiugda usab sa padayong koordinasyon sa kapulisan ug mga ahensya sa gobyerno sa kampanya batok sa ilegal nga droga.
Photo courtesy: DCPO
