Mas gipalapdan karon sa panggamhanan niining probinsya sa Sugbo ang pagsubay sa gigikanan sa African Swine Fever kon ASF sa lungsod sa Ginatilan diin gikan sa duha ka barangay nga apektado, gihurot na pagmonitor ang 14 ka mga barangay.
Sumala kang Provincial Veterinarian Dr. Mary Rose Vincoy nga wala pa nila matino ang tinubdan sa impeksyon samtang nagpadayon ang mga beterinaryo sa ilang paningkamot nga masayran ang “index case” o ang unang natakdan nga baboy.
Apan gibutyag ni Vincoy, nga aduna silay mga impormasyon nga nakuha atol sa imbestigasyon nagpunting sa posibleng kontak tali sa pipila ka natakdan nga mga baboy ug sa mga baboy nga gikan sa Negros Oriental.
Nakadawat usab og impormasyon ang mga awtoridad nga adunay pipila ka mga tag-iya og baboy nga mitambong sa usa ka pista sa Tanjay ug nagdala og linuto nga karne sa baboy pauli.
