Gipusil patay ang incumbent Barangay Captain sa Barangay Kansumandig, La Libertad, Negros Oriental samtang nagpauli sakay sa motorsiklo pasado alas-5:20 sa kaadlawon niadtong Miyerkules, Setyembre 23, 2026. Sumala sa PRO NIR, nagbiyahe pauli ang biktima gikan sa Barangay Pacuan dihang gipusil sa wala pa mailhing suspek.
Dali nga mitubag ang La Libertad MPS ug gisugdan ang imbestigasyon. Personal usab nga miadto sa crime scene si PBGEN Rudecindo L. Reales, Regional Director sa PRO NIR, ug gimandoan ang mga imbestigador nga sundon ang tanang leads.
Gipa-aktibo usab ang Special Investigation Task Group o SITG aron paspas nga matino ang suspek ug motibo sa krimen. Sa crime scene, narekober ang tulo ka empty shells sa .45-caliber firearm, upat ka slugs ug usa ka cellphone nga gi-preserbar isip ebidensiya.
Padayon ang imbestigasyon sa kapulisan, lakip ang pagpangita sa mga posibleng nakasaksi sa insidente. Sa pagkakaron, wala pa mailhi ang suspek o ang motibo sa pagpamusil.
Photo courtesy: Police Regional Office Negros Island Region (PRO NIR)
