Pinalalakas ng mga awtoridad ang security measures sa Cotabato City matapos ang mga karahasang naitala kaugnay ng katatapos na BARMM parliamentary elections.
Nagsagawa ng security assessment ang Cotabato City Peace and Order Council o CCPOC, kasunod ng mga insidenteng naitala sa lungsod noong panahon ng halalan.
Ayon sa Cotabato City Police Office, tatlo ang nasawi at 19 ang nasugatan sa loob ng election period. May mga persons of interest na ring tinutukoy sa ilang insidente.
Isa rin sa mga tinitingnang concern ng security sector ang pagpasok ng maraming indibidwal mula sa labas ng lungsod bago at habang isinasagawa ang halalan.
Bilang tugon, tatlong pangunahing hakbang ang inaprubahan ng CCPOC—kabilang ang clearing operations, pagdagdag ng police at military personnel, at mas mahigpit na pagmamatyag sa mga kahina-hinalang aktibidad.
Iniutos naman ni Mayor Mohammad ali “Bruce” Matabalao ang agarang pagkilala at pagsasampa ng kaso laban sa mga mapapatunayang sangkot sa mga insidente, anuman ang kanilang political affiliation.
Patuloy namang binabantayan ng mga awtoridad ang sitwasyon upang mapanatili ang kapayapaan at kaayusan sa Cotabato City.
