Padayon nga gipalig-on sa PNP Maritime Group sa Zamboanga Sibugay ang ilang pagbantay sa kadagatan aron mapugngan ang lain-laing ilegal nga kalihukan, lakip na ang smuggling sa mga kontrabando, ilegal nga pagpangisda ug uban pang ilegal nga shipment.
Sumala kang Maritime Station Chief PCPT Marlene A. Galvez, importante ang padayong pagpatrolya ug pagmonitor sa mga lugar nga posibleng agianan sa mga ilegal nga produkto ug kalihukan. Pinaagi niini, gitinguha sa kapulisan nga mapugngan ang pagsulod ug pagbiyahe sa mga kontrabando nga mahimong makaapekto sa seguridad ug panginabuhian sa mga residente.
Gipasiugda usab ni PCPT Galvez ang importansya sa koordinasyon tali sa Maritime Group, ubang law enforcement agencies ug mga komunidad sa baybayon. Ang aktibong partisipasyon sa mga residente makatabang aron mas dali nga ma-report ug matubag ang mga kahina-hinalang kalihukan sa kadagatan.
Gipahinumdoman ang mga mananagat, boat operators ug mga residente sa coastal areas nga mosunod sa mga balaod ug regulasyon sa kadagatan. Gidasig usab sila nga motaho dayon sa mga awtoridad kung makamatikod og kahina-hinalang sakayan, kargamento o kalihukan sa ilang lugar.
