Aktibong misalmot ang Davao Norte Police Provincial Office (DNPPO) sa “Handog ng Pangulo: Serbisyong Sapat Para sa Lahat” nga gipahigayon sa DavNor Gymnasium, Davao Norte Tourism and Sports Complex, Tagum City, kagahapong adlawa Setyembre 14, 2026.
Kabahin ang maong kalihokan sa mga serbisyo sa gobyerno alang sa katawhan, ilabi na sa selebrasyon sa anibersaryo sa pagkatawo ni Presidente Ferdinand “Bongbong” Marcos Jr.
Gipangulohan ni Davao del Norte Governor Edwin I. Jubahib ang aktibidad. Gitigom sa maong programa ang nagkalain-laing ahensya sa gobyerno aron direktang mahatagan og serbisyo, tabang ug impormasyon ang mga residente sa probinsya.
Kabahin sa suporta sa kapulisan, gipadali sa Tagum City Police Station ang pag-isyu sa National Police Clearance, aron mas sayon ug mas duol sa mga residente ang pag-avail sa maong serbisyo.
Samtang, ang mga personnel sa DNPPO nagpabiling naka-deploy aron siguruhon ang seguridad, kalinaw ug hapsay nga pagpadagan sa tibuok kalihokan.
Atol sa programa, mipadala usab og mensahe gikan kang Presidente Marcos si DENR Undersecretary Ignatius Loyola Rodrigues, diin gipasiugda ang paningkamot sa administrasyon nga mapaduol ug mahimong mas responsive ug accessible ang serbisyo sa gobyerno ngadto sa matag Pilipino.
Gipakita sa kalihokan ang importansya sa panaghiusa ug kooperasyon sa nagkalain-laing ahensya sa gobyerno aron masiguro nga ang mga programa ug serbisyo makaabot sa mga tawo nga labing nanginahanglan niini.
Photo Courtesy: Davao Norte Police Provincial Office
