Mokabat sa P5.5 milyon nga kantidad sa farm machinery ug equipment ang gipanghatag sa Department of Agrarian Reform sa Caraga Region (DAR-13) ngadto sa unom ka Agrarian Reform Beneficiaries Organizations (ARBOs) sa rehiyon niadtong Lunes, atol sa nationwide nga inisyatiba nga “Handog ng Pangulo.”
Ang maong ayuda gitumong sa pagdala sa suporta sa gobyerno direkta ngadto sa mga mag-uuma aron mapalambo ang ilang produksyon ug panginabuhian.
Ubos sa Climate Resilient Farm Productivity Support Program (CRFPSP) sa DAR, mokabat sa 569 ka Agrarian Reform Beneficiaries (ARBs) gikan sa unom ka lungsod ang makabenepisyo sa maong programa.
Sa kinatibuk-ang kantidad, P4.9 milyon ang gigahin alang sa upat ka ARBOs ubos sa Major Crop Block Farming program, samtang P560,960 nga kantidad sa mga kagamitan ang gihatag ngadto sa duha ka ARBOs ubos sa Sustainable Livelihood Support programs.
Lakip sa mga nakadawat sa ayuda mao ang mosunod:
– Rosario Agrarian Reform Cooperative, Agusan del Norte — nakadawat og four-wheel-drive farm tractor.
– Malipayon Pag-asa Agrarian Reform Cooperative, Agusan del Sur — nakadawat og single-pass rice mill.
– Rural Improvement Club Coop Producers (RICCP), Surigao City — nakadawat og tractor nga adunay rotary tiller ug trailer.
– Tagasaka Agrarian Reform Beneficiaries Cooperative, Surigao del Sur — nakadawat og rice combine harvester.
Sa Dinagat Islands, ang Cabungaan Multi-Purpose Cooperative ug Navarro Multi-Purpose Cooperative matag usa nakadawat og package sa kagamitan nga naglakip sa rice thresher, mudboat, grass cutter, ug knapsack sprayer.
Photo courtesy: DAR CARAGA
