Gipangulohan sa 93rd Infantry “Bantay Kapayapaan” Battalion, 8th Infantry Division, Philippine Army, uban sa koordinasyon sa nagkalain-laing ahensya sa gobyerno ug local government units (LGUs), ang paghikay alang sa paghatod sa patayng lawas ni Erwin Murillo Maceda alyas “Romnick,” usa ka miyembro sa Communist Terrorist Group (CTG), ngadto sa iyang pamilya human sa bag-ohay nga engkwentro tali sa militar ug walhong grupo didto sa Brgy. Caridad, Baybay City, Leyte niadtong nakalabay nga Setyembre 08, 2026.
Sumala sa 93rd Infantry Battalion, gilayon silang nakigkoordinar sa mga otoridad ug sa pamilya ni Maceda aron masiguro ang hustong pagdumala, turnover ug luwas nga pagbiyahe sa patayng lawas padulong sa Northern Samar. Personal nga gidawat sa iyang igsoon nga si Allan Bantillo ang patayng lawas didto sa Pambujan, Northern Samar, ug mipas-an sa responsibilidad sa pagpauli niini alang sa katapusang pagpahiluna.
Nakatampo usab sa maong proseso ang lokal nga pagamhanan sa Baybay, ubos sa pagdunala ni Mayor Jose Carlos L. Cari, ug ang lokal nga pagamhanan sa Kananga pinaagi usab ni Mayor Matt Torres, ingon man ang lokal nga pagamhanan sa Pambujan ubos sa pagdumala ni Mayor Owen Lamberto L. Siervo, lakip ang ubang ahensya ug personnel sa gobyerno.
Matud pa sa kasundalohan, ang koordinadong paningkamot nagtumong sa pagsiguro nga ang pamilya matagaan og hustong tabang sa panahon sa ilang kasubo, samtang gipasiugda nga ang dignidad ug respeto sa kinabuhi kinahanglan magpabiling giila bisan taliwala sa armadong panagbangi.
Photo Courtesy:93rd Infantry Battalion
