Gipalambo karon sa Leyte ang paghimo og school bags gamit ang abaca isip dugang nga mapuslanong produkto ug alternatibong tinubdan sa panginabuhian alang sa mga lokal nga komunidad. Sumala sa Philippine Fiber Industry Development Authority o PhilFIDA, gipahigayon gikan Setyembre 8 hangtod 11 ang training sa paghimo og abaca school bags sa Leyte, human sa training of trainers nga gipahigayon sa Southern Leyte gikan niadtong Setyembre 1 hangtod 4.
Dili lamang ang paghimo sa bag ang sakop sa maong pagbansay, kondili apil usab ang pagdisenyo, assembly, finishing ug quality control aron masiguro ang kalidad ug kalig-on sa mga produktong hinimo gikan sa lokal nga abaca.
Una nang nakahimo og lig-on ug functional nga school bags ang 25 ka trainers gamit ang locally produced abaca twine. Gilauman nga ipasa usab nila ang ilang nakat-unan nga kahanas ngadto sa mas daghang fiber-producing communities sa rehiyon.
Base sa datos sa 2024, nanguna ang Southern Leyte sa abaca production sa Eastern Visayas nga adunay 1,457 metric tons, samtang nakaproduce og 606.16 metric tons ang Leyte.
Pinaagi sa maong programa, tumong sa PhilFIDA nga madugangan ang bili sa abaca pinaagi sa paghimo og finished products, imbes nga magpabilin lamang kini isip hilaw nga materyales, ug sa samang higayon makahatag og dugang nga oportunidad sa panginabuhian alang sa mga lokal nga komunidad.
