Dakong pagmahay ang gibati karon sa usa ka babaye sa Bangkok, Thailand human nga miabot sa punto nga mawalaan na siya og buhok gumikan gi-opawan sa bartender sa bar sa maong lugar.
Sumala sa taho, giingong adunay bayranan ang babaye nga mikabat ngadto sa 60,000 baht kun kapin ₱100,000.00. Nasayran nga nabisto kini human nga migamit og peke nga identification card ug misulay pa sa pagbiya sa maong establisemento.
Apan, wala nagmalampuson ang iyang plano ug nasakpan gihapon sa mga trabahante sa maong bar ug gipugos sa pagbayad. Matod pa sa babaye nga wala siyay pambayad sa maong kantidad ug miuyon na lamang kini nga ipaputol ang iyang buhok o ipa-opaw.
Ang maong panghitabo nahimong kontrobersiya ug gikuwestiyon usab sa usa ka tigpasiugda sa pagpanalipod sa mga bata ang maong paagi sa pagsilot, nga giingong dili kini angay buhaton.
Tungod niini, ang Ministry of Social Development and Human Security sa Thailand nagpahigayon na og imbestigasyon aron masuta ang tinuod nga nahitabo ug kung adunay nalapas nga balaod sa maong insidente.
Photo Courtesy: NY Post
