Nadakpan sa mga kapulisan ang usa ka Top 8 Regional-Level Most Wanted Person atol sa operasyon pasado alas-4:00 sa hapon karong adlawa sa Purok 11, Barangay Poblacion, Bayugan City, Agusan del Sur.
Ang operasyon gipangulohan sa mga personnel sa Bayugan Component City Police Station ubos sa pagdumala ni PLTCOL Josef Carlo V. Silang, Chief of Police. Ang nadakpan giila lamang sa alyas “Boy,” 63 anyos, minyo, ug residente sa Purok 1, Barangay Mabicay, Sogod, Southern Leyte.
Gidakop siya pinasikad sa Warrant of Arrest nga gipagawas sa Regional Trial Court Branch 7 sa Bayugan City may kalabotan sa Criminal Case No. 6527 alang sa kaso nga Kidnapping and Serious Illegal Detention with Ransom, ubos sa Article 267 sa Revised Penal Code, nga gi-amyendahan sa Republic Act No. 7659.
Ang warrant gipetsahan Agosto 25, 2026, gipirmahan ni Hon. Ferdinand R. Villanueva, Executive Judge, ug walay girekomendar nga piyansa.
Sa pagkakaron, anaa na sa Bayugan CCPS Custodial Facility ang nadakpan samtang gihulat ang angay nga legal nga proseso.
Photo courtesy: Bayugan PNP
