Lima ka drug personalities ang nadakpan sa upat ka managlahing operasyon sa kapulisan sa Surigao del Sur gikan Septiyembre 5 hangtod 7, 2026, isip kabahin sa gipakusgang kampanya batok sa illegal nga droga ug loose firearms sa probinsya.
Ubos sa pagpangulo ni Surigao del Sur Police Provincial Office, Provincial Director PCOL Jeffrey Lawrence D. Mauricio, ang mga operasyon gipahigayon sa nagkalain-laing Municipal Police Stations, uban sa koordinasyon sa Philippine Drug Enforcement Agency (PDEA.)
Sa kinatibuk-an, kapin 15.22 gramos sa gituohang illegal nga droga nga adunay gibanabanang street value nga ₱103,496 ang nakumpiska, lakip ang mga bala, drug paraphernalia ug uban pang mga gamit.
Sa Barobo niadtong Septiyembre 5, alas-11:45 sa gabii, nadakpan ang 21-anyos nga giila sa alyas “Jan-jan,” usa ka Street-Level Individual (SLI), atol sa buy-bust operation sa Purok 6, Barangay Poblacion. Nakumpiska gikan kaniya ang 1.43 gramos sa gituohang illegal nga droga nga nagkantidad og ₱9,724, buy-bust money, Infinix cellphone ug tulo ka lighter.
Samtang, sa Madrid niadtong Septiyembre 6, alas-7:10 sa buntag, nadakpan ang 40-anyos nga alyas “Jes,” human ipatuman sa Madrid MPS ang search warrant sa Purok 4, Barangay San Juan. Nakuha sa operasyon ang 2.19 gramos sa gituohang illegal nga droga nga adunay gibanabanang bili nga ₱14,892, drug paraphernalia, ug nagkalain-laing buhing bala alang sa 5.56mm, 9mm, caliber .22 ug caliber .40 nga armas, lakip ang aluminum magazine.
Sa Lianga, nadakpan usab ang 35-anyos nga alyas “Pakoy,” usa ka SLI, atol sa joint buy-bust operation sa Purok 2 Richymer, Barangay Diatagon, alas-5:30 sa hapon niadtong Septiyembre 6. Nakumpiska gikan sa suspek ang 10 gramos sa gituohang illegal nga droga nga gibanabanang nagkantidad og ₱68,000 ug buy-bust money.
Samtang sa Lanuza, duha ka persona ang nadakpan atol sa buy-bust operation nga gihimo alas-4:30 sa kaadlawon, Septiyembre 7 sa National Highway, Barangay Nurcia. Ang mga nadakpan mao ang 41-anyos nga High-Value Individual (HVI) nga alyas “Junjun” ug 36-anyos nga SLI nga alyas “Jay.” Nakuha sa operasyon ang 1.6 gramos sa gituohang illegal nga droga nga adunay gibanabanang kantidad nga ₱10,880, buy-bust ug boodle money, cellphone ug Honda Click motorcycle.
Ang mga suspek ug mga nakumpiskang ebidensya gidala sa tagsa-tagsa nilang Municipal Police Stations alang sa hustong disposisyon ug pagpasaka sa kaso tungod sa posibleng paglapas sa Republic Act 9165 o Comprehensive Dangerous Drugs Act of 2002 ug Republic Act 10591 o Comprehensive Firearms and Ammunition Regulation Act.
Photo courtesy: Surigao del Sur Police Provincial Office
