Nagpagawas og pahimangno ang Bureau of Fisheries and Aquatic Resources (BFAR) Caraga human nga positibo sa Paralytic Shellfish Toxins (PST) ang mga sample sa unod sa shellfish o kinhason nga nakolekta gikan sa Lianga Bay, Surigao del Sur.
Base sa laboratory analysis nga gihimo sa BFAR-National Fisheries Laboratory Division gamit ang Enzyme-Linked Immunosorbent Assay screening test, nakit-an ang presensya sa PST sa maong mga sample.
Samtang gihulat pa ang resulta sa confirmatory test, nagpagula ang BFAR og precautionary advisory aron maprotektahan ang publiko ug ang industriya sa shellfish. Gipahimangnoan ang publiko nga likayan una ang pagpangolekta, pagbaligya ug pagkaon sa tanang matang sa shellfish o kinhason, lakip ang Acetes species sama sa alamang o hipon, nga gikan sa Lianga Bay.
Gihimo ang maong lakang aron malikayan ang posibleng shellfish poisoning nga mahimong mahitabo tungod sa presensya sa makahilong toxins sa shellfish. Samtang, giingon sa BFAR nga ang isda, kasag ug nokos mahimo ra nga kan-on. Kinahanglan lamang nga tangtangon ang tanang tinai ug hugasan pag-ayo sa dili pa kini lutuon ug kan-on.
Dugang pa, gipadayag usab sa BFAR ug sa lokal nga pangagamhanan nga padayun nila nga i-monitor ang kahimtang sa Lianga Bay aron masiguro ang kaluwasan sa publiko ug mapanalipdan ang industriya sa shellfish.
Gihangayo usab sa BFAR ang kooperasyon sa publiko ug ang hugot nga pagsunod sa maong pasidaan hangtod nga makumpirma ang resulta sa laboratory testing.
Photo courtesy: BFAR Caraga
