Nadakpan sa hiniusang operasyon sa kapulisan ug militar ang usa ka giingong high-ranking personality sa Communist Terrorist Group (CTG), nga nakalista isip Top 2 Most Wanted Person sa rehiyon, sa Barangay Sudlon, Barobo, Surigao del Sur niadtong Septiyembre 5, 2026.
Nailhan ang suspek sa alyas “Jepoy,” 53 anyos, residente sa Sitio Emerald, Barangay Diatagon, Lianga, ug giingong kanhi Political Instructor sa Sub-Regional Committee Southland sa North Eastern Mindanao Regional Committee (NEMRC).
Nasikop si “Jepoy” pinaagi sa mga warrant of arrest nga gi-isyu sa Regional Trial Court Branch 28 sa Lianga, nga nag-atubang og tulo ka kaso sa murder, duha ka frustrated murder ug duha ka attempted murder.
Sumala sa kapulisan, ang tulo ka murder charges walay rekomendasyon alang sa piyansa, samtang adunay gitakdang piyansa alang sa mga kaso sa frustrated ug attempted murder.
Gipangulohan sa Barobo Municipal Police Station ang operasyon uban sa RIU-13, PNP-SAF, mga yunit sa Philippine Army, RMFB-13 ug RID-13. Gidala na ang suspek sa Barobo MPS alang sa dokumentasyon ug hustong disposisyon sa korte.
Photo courtesy: SDSPPO
