Nadakpan ang usa ka 21-anyos nga lalaki ang sa gipahigayong drug buy-bust operation sa kapulisan sa Barobo Municipal Police Station niadtong Septiyembre 5, 2026.
Nahitabo ang operasyon pasado alas-11:45 sa gabii sa Purok 6, Barangay Poblacion, Barobo, Surigao del Sur, isip kabahin sa gipakusgang kampanya sa kapulisan batok sa illegal nga droga.
Gipangulohan ang operasyon sa Drug Enforcement Unit o DEU sa Barobo MPS ubos sa pagpangulo ni PMAJ Andrew G. Lupian, Acting Chief of Police, ug gipahigayon sa koordinasyon sa Regional Intelligence Unit 13 o RIU 13, Regional Intelligence Division 13 o RID 13, ug Philippine Drug Enforcement Agency–Surigao del Sur Provincial Office (PDEA-SDS).
Nasikop sa maong operasyon ang usa ka lalaki nga giila sa alyas nga “Jan-Jan,” 21 anyos, ulitawo, walay trabaho ug residente sa Purok 4, Barangay Amaga, Barobo.
Narekober gikan sa operasyon ang upat ka heat-sealed transparent plastic sachets nga adunay sulod nga gituohang shabu.
Base sa report sa kapulisan, ang kinatibuk-ang gibug-aton sa gituohang iligal nga droga mokabat sa 1.43 gramos, nga adunay gibanabanang Standard Drug Price nga 9,724 pesos.
Gipahigayon usab ang inventory ug dokumentasyon sa mga nakumpiskang ebidensya atubangan sa mga gikinahanglang saksi, subay sa mga probisyon sa Section 21 sa Republic Act No. 9165, o Comprehensive Dangerous Drugs Act of 2002, isip gi-amendar.
Ang nadakpan anaa na karon sa kustodiya sa Barobo Municipal Police Station alang sa hustong disposisyon ug pagpasaka sa tukmang kaso tungod sa giingong paglapas sa Republic Act No. 9165, o Comprehensive Dangerous Drugs Act of 2002.
Photo courtesy: Barobo Municipal Police Station
